ايمي عبد الغني تدعم تشجيع السياحة على طريقتها الخاصة

ايمي عبد الغني تدعم تشجيع السياحة على طريقتها الخاصة

حرصت Miss Beauty 2020 ، Miss elegant multimedia 2020 الموديل ايمي عبد الغني على دعم السياحة المصرية وتشجيع الأجانب على العودة إلى زيارة معالم مصر السياحية وذلك على طريقتها الخاصة.

وتقوم ايمي عبد الغني من وقت لآخر بالسفر إلى عدة أماكن سياحية مميزة وذلك للاستمتاع بأجواء الصيف وأيضا لتشجيع المواطنين السائحين الأجانب على زيارتها والاستمتاع بها.

وكتبت ايمي عبد الغني عبر صفحتها الرسمية على موقع التواصل الاجتماعي فيس بوك

طيب عشان جال الف سؤال عن طلعة دهب ️:

_ لو معاك عربية الطريق هياخد معاك حوالي ٦ ساعات اهم حاجة ماتكونش عربية دفع رباعي عشان هيرجعوك بيها من اول نفق ..

_ لو مش معاك عربية بلاش جو باص لأسباب كتير أهمها انه كبير و ده بيخلي الطريق ياخد معاكم حوالي 12 ساعة لانه في كل كمين في تفتيش لكل راكب و كل شنطة فكل ما كان عدد الركاب اقل وصلتوا أسرع و من غير فرهدة ..
و بعد تجربة بلاش كمان we bus غير أمناء تماما

_ تذكرة الباص حوالي 320 جنيه للفرد و في راجل جميل انا راجعة معاه مريح و ب 275 جنيه ..

_ الإقامة في دهب يااما اوتيل يااما بيوت يااما كامبات لو بنات ماارجحش كامب و الاماكن سعرها هناك حنين يعني من 300 جنيه وانت طالع في الليلة للفرد ..

_ دهب طلعة شبابية جدا يعني عاوزة ناس مابتقفش كتير عشان تاخد قرارات اللي هو يلا يبقى يلا فبلاش إعداد كبيرة عشان المشورة و اعتقد العائلات مش هتتبسط اوي بس في ناس بتعرف تتبسط في اي مكان المهم تعرفوا ان طبيعة المكان جبل و مياة و شوية كافيهات مفيش بقى شواطئ بشماسي و الكلام ده لكن في نزول مياه عادي ..

_ وانت رايح لازم تبقى عارف انك هتنعزل غصب عنك لان معظم الوقت موبايلك لاقط شبكة سعودية فالحمدلله محدش بيوصلك كتير ..

_ احلى مكان هتفصلوا فيه و تاخدوا احلى صور بجد

_ من اكتر مميزات دهب ان الناس هناك ملهاش دعوة مين بيعمل ايه اللي قالع قالع و اللي لابس لابس لا بصة من فوق لتحت و لا حد بيضايق حد ..

_ لو انتي رايحة دهب بغرض الاسترخاء خدي معاكي لبس واسع و مريح و بلاش ميكب كتير عشان هتحسي نفسك غريبة وسط الموجودين ..

_ لو مش معاكي عربية يفضل تنزلي في مكان قريب من الممشى عشان تبقى الحياة سهلة لانه هناك كل المعيشة تقريبا ..

القواعد ال 35 للسفر الى دهب
(خد كمامتك معاك والكحول بتاعك .. كل حاجه هناك بتتعقم ونضيفه جدا)
1- لازم بطاقتك ساريه مش منتهيه او جواز سفرك ساري
2- اي حد عليه (لاقدر الله) قضيه أو جنحه بسيطه حتى لو سرقه عداد او سب مش هيعدي من اول كمين (النفق)
3- الطريق بالعربيه الملاكي (5 ساعات ) بالطريق الجديد (طريق عيون موسي)
4- الطريق بالباص (10 ساعات) عشان بياخد الطريق القديم وبيقف في ال7 كماين
5- فيه حوالي 7 كماين شرطه وجيش محترمين جدا طول الطريق ومن اصعب مما تتخيل ، فبلاش استظراف معاهم ابدا
6- احذر تاخد اي ممنوعات معاك لا تحطها في شراب ولا تشيلها مع بنت كله بيتفتش بالشنط في كمين النفق و كمين شرم بالذات دول ، والحوامل والاطفال بينزلو مينفعش يعدوا من بوابات الأشعه في كمين نفق الشهيد احمد حمدي وكمين شرم
7- لو هتسافر بالعربيه هتفّول عربيتك مرتين .. مره من اول طريق السويس ومره في نص الطريق
8- لو هتسافر بالباص جو باص من اول 280 جنيه ذهاب فقط .. ذهاب وعوده ارخص ومنصحكش تعملها ذهاب وعوده .. اقعد زي ماتحب هناك واحجز من هناك عوده
9- ممنوع العربيات الدفع الرباعي تسافر ومش هتعدي من كمين النفق ولا الأجانب
10- متنساش كوتشي البحر و ماسك الوش والتيوب عشان دهب من تاني اجمل مكان في العالم للاسنوركيلينج و الغطس (وممكن تشتري الماسك والكوتشي او الزعانف من هناك)
11- اللي يسافر دهب منصحوش يقعد في فندق خمس نجوم ولا حتي 4 .. ياتقعد في كامب يا تقعد في موتيل علي الممشي أو حتي تأجر شقه او ستوديو
12- الاسعار بتبدأ من 200 جنيه للفرد في الغرفه المزدوجه في موتيلات كتير (يعني 400 للغرفه) وبتزيد ويمكن متلاقيش اماكن في الفنادق
13- الاستوديوهات والشقق ع البحر ممكن تأجرها شهر كامل من اول 2500 جنيه بره الاعياد
14- نصيحه خد كاميرا معاك او كارت ميموري جديد في موبايلك .. كل شبر فدهب بيتصور .. وكل وقت شروق وغروب وفجر وظهر وعصر ومغرب وعشا بيتصور
15- دهب مفهاش كورونا الحمدلله ولا فيها معاكسات ولا تحرش ولا حد بيجرح حد بنظراته ولا بكلامه .
16- اللي بيعمل اللي فوق ده بيتعرف علطول انه سنه اولي دهب وبيبقي شكله سخيف جدا
17- البس براحتك والبسي براحتك بيكيني 1 peace – 2 peace او اي حاجه محدش هيحاسبك ولا هيجرحك ولا هيستظرف بكلمه .
18- كل شواطيء دهب شغاله بلا استثناء فيما عدا المحميات الطبيعيه بلو هول و راس محمد ويارب يشتغلو زي ماقالو في العيد او بعده
19- اياك ثم اياك ترمي حاجه ع الارض وانت ماشي لا منديل ولا كانز ولا عقب سيجاره ..
20- اللي بيخاف من الكلاب .. دهب كلها كلاب أليفه جدا عايشين وسط الناس فكل مكان ع البحر وجنبك في المطاعم متجريش منهم ولا تخاف منهم كلهم يجننوا
21- منصحكش تنزل في فندق وتدور علي اكل فيه .. استمتع بأكل بره
22- الاكل في دهب رخيص زي القاهره ..
23- اشهر مطعم للفطار اسمه يم يم فول وطعميه وبطاطس والحاجات بتاعتنا دي
24- اشهر مطعم للغدا والعشا اسمه كينج تشيكين تحفه فوق الوصف
25- اشهر مطعم اسماك اسمه عروس البحر واسعاره حلوه بجد
26- دهب مش للنوم ابدا .. دهب للخروج من الفجر للفجر فعليا
27- يومك يبدأ بنزول البحر من اي مكان واشهرهم (يلا بار) او الثري بولز (شاطي صخري للشعب المرجانيه ) وفيه شواطيء كتير ساندي بيتش او رملي
28- لو قعدت 5 ايام متنزلش كل يوم البحر فنفس المكان .. غيّر كل يوم لان دهب مدينه صغيره بس معالمها كتير اووووي ومش هتلحق تخلصها فعليا
29- اياك ثم اياك تاخد حاجه من البحر او من الشعب المرجانيه لانها محميه طبيعيه ، وفيه شعب مرجانيه لو لمستها تحت البحر هتحرق ايدك خد بالك
30- لازم تروح اللاجونا و الثري بولز و البلو هول (لوفتح) وجبل الطويلات و ابو جالوم وتبات ليله في الجبل قمه المتعه ..
31- متنساش الكاميرا هتندم لو متصورتش كتير هناك .كل الأماكن شغاله من الصبح بدري بنوك ومطاعم وشواطيء و كافيهات (بدون شيشه)
32- اياك تصور حد هناك بدون علمه لا فبحر ولا في اي مكان .. راعي الناس كويس جدا
33- العرب والبدو هناك جدعان ويخدموك جدا واوعي تستظرف علي حد فيهم او تتنك عليهم ..
34- دهب فيها حريه واستقلاليه وهدوء وسلام نفسي رهيب وكل حاجه بتتباع في السوبر ماركت باسعارها العاديه مش اسعار سياحيه حتي الحكوليات عادي جدا
35- مفيش تاكسيات في دهب .. بتاخد عربيه ربع نقل وبتركبها عادي في الصندوق الخلفي بتاعها كله هناك كده .. وخد رقم سواق منهم وخليه معاك هيظبطك جدا فكل حاجه وفاي طلعه طالعها . وخصوصا لو هتروح تشوي فراخ ولحمه وسمك في اللاجونا .. بيجهزلك كل حاجه وبيفضل معاك
سافر واستمتع جدا وشوف حلاوه بلدك في دهب اعظم مكان علي وجه الارض
دهب أجمل بكتير من كل الصور اللي بتشوفوها او هتشوفوها.