فن

نهى سعيد تتوجه بالشكر إلى هؤلاء بسبب حواديت الشانزليزيه

قامت الكاتبة نهى سعيد بتوجيه رسالة إلى كل طاقم عمل مسلسل حواديت الشانزليزيه والى كل من ساهم في نجاح هذا العمل.

ونشرت نهى سعيد عبر حسابها عبر فيس بوك “صباح الخير ، بوست طويل شوية استحملوني”.

“الحمد لله خلصنا إمبارح تصوير مسلسلنا الأول حواديت الشانزلزيه، اللي ربنا وحده يعلم أيمن سليم وأنا تعبنا فيه أد إيه، مش بس واحنا بنخترع أحداثه وتفاصيله وبنضفر ضفايره وبنعمله المعالجة الدرامية، لأ إحنا تعبنا كمان واحنا بنحلم بيه، بكل كلمة كتبناها هتبقى إزاي وهتتقال إزاي وهتتمثل ازاي، والحقيقة عايزة أشكر كل حد شارك معانا الحلم ده وساهم في إنه يبقى حقيقة بداية من شركة سينرجي والمخرج مرقس عادل وكل نجوم المسلسل من أكبر فنان لأصغر فنان فعلا كان شرف كبير لينا إنكم تعيشوا حواديتنا وتقولوا كلامنا وتوصلوا خيالنا للناس اللي هتتفرج وهتفرح بيكم كلكم بإذن الله، ومرورا بهندسة الديكور والأزياء العبقرية والتصوير والإضاءة ووصولا لأصغر عامل كان موجود في اللوكيشن”.

موعد مسلسل حواديت الشانزليزيه

وأضافت “ومقدرش أنسى أشكر أهلنا اللي ربونا وربوا فينا حب الفن وقيمة الموهبة وزقونا زق عشان نحقق حلمنا ووفرولنا كل معاني السند والدعم المعنوي والمادي وأنا شخصيا هخص رحاب أختي حبيبتي اللي احتوت هيا وميكي كل نفس فيا عشان أقدر أكمل وأعافر وأفرح وطبعا حمادة حبيبي ورانيا.. وولادهم أول معحبين ليا في حياتي .. وأنا متأكدة إن أيمن عنده نفس الكلام بالنسبة لأهله اللي كمان بحبهم وبعتبرهم أهلي زي ما بعتبره أخويا التاني.. ده طبعا غير أصدقائنا الغاليين اللي كانوا بيوتنا المتنقلة المفتوحة في كل مكان وفي أي وقت وكانوا فعلا أهلنا التانيين اللي فاهمينا ومتحملينا ومتحملين عصبيتنا وغيابنا واختفائنا وعدم ردنا.. لأ وكمان بيدعولنا من قلبهم ربنا يكرمنا ويكتبلنا الخير، رغم إن هما كل الخير اللي ربنا كتبهولنا والله”.

مسلسل حواديت الشانزليزيه

وأكملت “كمان طبيعي أشكر كل حد وقف في طريقنا وحاربنا وحاول يهز ثقتنا في نفسنا، وحاول يهز صورتنا، لأنه فعلا فادنا وعلمنا كتير وادانا دروس تمنها ميتقدرش بفلوس العالم هتنفعنا في حياتنا أدام”.

وتابعت “لكن الحقيقة إن ختام البوست ده هو السبب الأساسي لأني أصلا أكتبه.. عايزة أشكر وأعبر عن حبي وامتناني وانتمائي لمهنة الصحافة الفنية في مصر.. بيتي وعزوتي وأهلي وأخواتي اللي بجد لولا دعمهم لينا وكتابتهم عن حلمنا كأنه حلمهم بالظبط وتشجيعهم اللي لم ولن ينقطع أو يتوقف يوم، وتسامحهم وجمالهم وجمال قلوبهم وجدعنتهم.. لولا كل ده مكناش حسينا بطعم الفرحة فرحة خلم بيترجم لواقع، فرحة مسلسل كل الناس عارفينه وسامعين عنه قبل ما نبدأ نصوره”.

واختتمت “شكرا مش كفاية وبوست مش كفاية ولو هفضل أمتن لكم كلكم كل يوم مش كفاية، ولو هكتب اسم واحد واحد فيكم مش كفاية.. لكن رغم ضخامة المشاعر لا يبقى إلا المتاح هنا وهو إني اقولكم شكرا من قلبي انكم عشتوا معانا الحلم وصدقتوه وكبر وسطكم.. من قلبي لكم أنتم نهى سعيد”.

ومن المقرر بدأ إذاعة المسلسل بداية نوفمبر المقبل عبر قناة MBC4 ، علما بأن شركة سينرجي طرحت برومو مسلسل حواديت الشانزليزيه بشكل رسمي للجمهور.

جدير بالذكر أن مسلسل حواديت الشانزليزيه بطولة إياد نصار وإنجى المقدم و مى سليم و داليا مصطفى و إدوارد و فريدة سيف النصر و محمد عبدالحافظ و عارفة عبدالرسول وعدد آخر من النجوم ، قصة : أيمن سليم ، سيناريو و حوار : أيمن سليم – نهى سعيد ، إخراج : مرقس عادل ، إنتاج : المنتج تامر مرسى ، منتج فنى : فتحى إسماعيل.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى