فن

احمد السعدني يكشف أهم اللحظات مع زوجته السابقة بعد وفاتها

قام الفنان أحمد السعدني بمشاركة متابعيه وجمهوره أبرز لحظات حياته مع زوجته السابقة والتي فارقت الحياة في الساعات الماضية وذلك عبر صفحته الرسمية على موقع التواصل الاجتماعي فيس بوك.

وقال السعدني “عمري في حياتي ما اتكلمت عن حياتي الشخصيه لكن حسيت اني لازم اعمل كده دلوقتي ، فذكر إن الذكري تنفع المؤمنين او الكافرين او المستهبلين او تنفع اي حد ححس اني عملت حاجه”.

زوجة احمد السعدني

وتابع “ححاول مطولش يوم ٩/٩/٢٠٠٣ حب من اول نظره في الشارع ما بين معهد السينما حيث كانت تدرس و معهد فنون مسرحيه حيث كنت الهو و ادرس برضه ميضرش كنت راكب عربيه و كانت ماشيه علي رجلها كنت حخبطها لكن حصل خير لا محصلش قوي خبطتتي هي في قلبي حب تقطيع شرايين سنه”.

وأضاف “خطوبه سنه كتب كتاب شهر جواز خلفه اول ولد هنا بدأت المشكله اللي بكتب الكلام ده عشانها ، انا زي كتير للاسف شباب anti تحمل مسئوليه بص لنسب الطلاق و انت تفهم انا بيجيلي ارتيكريه لما احس اني مسئول و هي برضه حبيبتي زي بنات كتير بتقول طلقني اكتر مبتنطق اسمي كانت النتيجه في اول سنه بس حوالي ٤ طلاق شفهي كل الشيوخ ساعتها قالولنا ده لعب عيال الطلاق ليه شروط زي الجواز تمام اسكت بقي لا تعالي يا عم طبق الشروط ادي اول طلقه”.

واكمل “قشطه يا باشا عشت حياتك ؟ اه …ارتحت ؟؟ لا وحشتني وحشني حنيتها و حبها وهبلها متيجي نرجع يا بت يالا يا متخلف هوووووب جبنا تاني ولد نفس الاحساس نفس الارتكريه بس المرادي صموووووود مش حينفع نتطلق تاني لا تصدق نفعت الجانب الاناني في شخصيتي غلبني يا عم كبر مخك و عيش حياتك المشكله اني عمري مارتحت كنت عايز حضنها و حنيتها و هبلها بس كنت بأجل الرجوع يمكن اكبر او اعقل او اقدر اتحمل المسئوليه بجد حددت لنفسي سن معين ارجعلها فيه قال يعني حبقي نضجت بس ملحقتش”.

احمد السعدني وزوجتة

واختتم “ماتت في لحظه كانت بتكلمني قبلها بساعه و مكنتش عيانه كان عندها ضغط زي اغلب الشعب المصري الحمد لله ، ماتت و مشيت و قررت تسبني للابد كنت فاكرها حتستناني و متاكد من ده مستحيل تحب حد غيري مجاش في بالي انها ممكن تموت دلوقتي صغيره و اكتر واحده في حياتي شفتها بتحب الحياه و عندها طاقة ايجابيه ، ماتت و سابتلي الولدين و الندم انا متاكد انك في الجنه رحتي للي خلقك يوم عرفه و اميره و ست البنات و الستات و نضيفه و كريمه و صنتي ولادي و بيتي بحبك يا امل حياتي اللي اتهد و بوعدك المرادي حشيل المسئوليه للاسف اتعلمت الدرس بس بعد ما اتحرمت من حنيتك و حضنك و ولادك كمان اتحرموا من احن ام ربنا يقدرني و اربيهم احسن ما كنتي عايزه بحبك و مش بطلب منك غير انك تسامحيني ربنا يرحمك و يرحمني و يرحم ولادنا يا حبيبة عمري الوحيده”.

وتفاعل عدد من نجوم الوسط على ما كتبه السعدني ، حيث ذكرت الفنانة نشوى مصطفى في تعليق “قلبى وجعنى اوى ربنا يصبرك ويعينك ويقويك حبيبتك حتفضل عايشة معاك ملامحها حتشوفها فى ولادكم وروحها حتحاوطك انت وهما ربنا يراضى قلبك الطيب ويسامحك ويعينك على ولادك وتكمل رسالتك فيهم قلبى عندك يااحمد هون على نفسك”.

صور زوجة احمد السعدني

وقال الفنان محمد دياب “ربنا يرحمها ويصبرك ويقويك والله وجعت قلبى ربنا يعينك على اللى انت فيه”.

بينما ذكر الفنان أحمد فريد “البقاء لله حبيبي ، ربنا يرحمها ويصبرك علي فراقها ويحفظ أولادك ويقدرك علي المسؤليه وان شاء الله انت لها”.

وقالت الفنانة ريهام عبد الغفور “ربنا يصبرك يا حبيبي ويقدرك ع الولاد .. الله يرحمها ويحسن إليها.. حقيقي الإنسان مش حيسيب غير سيرة وهي سيرتها زي الفل.. فالجنة إن شاء الله”.

وعلقت الفنانة نور قدري “الله يرحمها يا احمد ويصبرك ويصبر ولادك ويديك الصحه والستر وربنا يقدرك على اللي جاي”.

وقال الفنان هاني رمزي “البقاء لله يا حبيبى وربنا يعزيكم ويصبركم ويقدرك على تربيه ولادك قلبى معاك يا أحمد”.

وقالت الفنانة أيمي سالم “مرواح امل كان صدمة لينا كلنا حبيبي … يا بال انت…. خليك فاكر انها يوم ما حبت، حبيتك انت….عشان انت راجل حنين و طيب … و الاهم احن و اطيب اب في الدنيا…. و ان شاء الله ربنا حيديك قوة اللي تخلي ولادكم احسن ولاد باريين بيك و داعيين ليها … و هي عند اللي احسن من الكل … ربنا يرحمها و يعاملها بما هو اهله … و كلنا جنبك و رينا ان شاء الله حيعينك”.

احمد السعدني وزوجتة بالصور

وقالت الكاتبة أنجي علاء “انا عملت كومنت على انستاجرام بس حاساة مش كافي والله .. قلبي معاك .. كلامك بيوجع وصادق اوي .. ربنا يرحمها ويصبرك ويعينك على تربية اولادك وان شاء الله هي سبب في انك تخش بيهم الجنة وربنا يقويك ومعاك”.

وذكرت الفنانة حنان مطاوع “يااااااقلبي. ربنا يرحمها ويصبرك. ويقدرك قلبي معاك”.

وعلقت الفنانة وفاء عامر بقولها “حبيبي ربنا يقدرك علي وعد و تربية اولادك و يصبرك وجعتني اووووي”.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى